रोटरी क्लब ऑफ डोंबिवली ईस्टची नवीन कार्यकारिणी स्थापन; अथर्व जोशी अध्यक्षपदी तर विद्यार्थी परिषदेचे सुबोध पटवर्धन सचिव
डोंबिवली:
रोटरी जिल्हा ३१४२ मधील सर्वात मोठा क्लब असलेल्या ‘रोटरी क्लब ऑफ डोंबिवली ईस्ट’च्या २०२६-२७ या वर्षाच्या नवीन कार्यकारिणीचा भव्य पदग्रहण सोहळा रोटरी भवन येथे अत्यंत दिमाखात संपन्न झाला.
या नवीन कार्यकारिणीत अत्यंत तरुण आणि तडफदार नेतृत्व म्हणून रो. अथर्व जोशी यांनी अध्यक्षपदाची, तर रो. सुबोध पटवर्धन यांनी सचिवपदाची धुरा सांभाळली आहे.
नवनिर्वाचित सचिव रो. सुबोध पटवर्धन यांचा मोठा जनसंपर्क असून त्यांनी विद्यार्थी दशेत ‘अखिल भारतीय विद्यार्थी परिषद’ (ABVP) मध्ये सक्रिय कार्य केले आहे.
तर दुसरीकडे, क्लबचे ज्येष्ठ सदस्य रो. रघुनाथ लोटे यांनी सलग ११ व्यांदा खजिनदारपदाची सूत्रे हाती घेऊन एक वेगळाच विक्रम केला आहे. या सोहळ्यात एकूण ४९ जणांची जम्बो कार्यकारिणी जाहीर करण्यात आली. मावळते अध्यक्ष डॉ. संदीप घरत यांनी नवीन अध्यक्ष रो. अथर्व जोशी यांच्याकडे अधिकृतपणे पदभार सुपूर्द केला.
पहिल्याच दिवशी सामाजिक उपक्रमांचा धडाका
पदभार स्वीकारताच नवनिर्वाचित अध्यक्ष रो. अथर्व जोशी आणि त्यांचे सहकारी यांनी आरोग्य, पर्यावरण आणि शिक्षण क्षेत्रातील सामाजिक उपक्रम राबवण्याचा संकल्प सोडला. त्यानुसार पहिल्याच दिवशी:
रक्तदान शिबिर: शिबिराचे आयोजन करून पहिल्याच दिवशी १०८ रक्तबॅग संकलित करण्यात आल्या.
‘दृष्टी’ आय बँक: प्रांतपाल रो. डॉ. निलेश जयवंत यांच्या हस्ते ‘आश्रय हॉस्पिटल’च्या माध्यमातून ‘दृष्टी’ आय बँकेचे लोकार्पण करण्यात आले.
फाउंडेशनला मदत: रोटरी क्लब ऑफ डोंबिवली ईस्टच्या वतीने रोटरी फाउंडेशनला $२१,०००/- (२१ हजार डॉलर्स) देणगीचा धनादेश सुपूर्द करण्यात आला.
मान्यवरांची उपस्थिती
या सोहळ्याला रोटरीचे प्रांतपाल रो. डॉ. निलेश जयवंत, असिस्टंट गव्हर्नर संजीव तांबे आणि क्लबचे आधारस्तंभ डॉ. उल्हास कोल्हटकर यांच्यासह रोटरी परिवारातील २५० हून अधिक पदाधिकारी व सदस्य उपस्थित होते.
प्रांतपाल डॉ. जयवंत यांनी आपल्या मार्गदर्शनात रोटरीच्या सामाजिक कार्याचा आढावा घेत उपस्थितांना मंत्रमुग्ध केले. या प्रसंगी वार्षिक क्लब बुलेटिन, सीएसआर (CSR) माहिती पुस्तिका आणि साप्ताहिक सभांचे वार्षिक कॅलेंडर यांचेही प्रकाशन करण्यात आले.
हा कार्यक्रम यशस्वी करण्यासाठी डायरेक्टर मानस पिंगळे, प्रोजेक्ट चेअरमन व सूत्रसंचालक रो. माधव चिकोडी आणि सर्व सदस्यांनी विशेष परिश्रम घेतले. कार्यक्रमाच्या शेवटी पुढील वर्षाचे (२०२७-२८) निर्वाचित अध्यक्ष आदिश मोने यांनी उपस्थितांचे आभार मानले.