मुख्यमंत्र्यांनाही लोकायुक्तांच्या कक्षेत आणणार उपमुख्यमंत्री देवेंद्र फडणवीस यांची माहिती
नागपूर दि.१८ :- नागपूरच्या हिवाळी अधिवेशनात आम्ही नवीन लोकायुक्ताचे विधेयक मांडणार असून या विधेयकाच्या माध्यमातून महाराष्ट्रात पहिल्यांदाच मुख्यमंत्र्यांनाही लोकायुक्त कायद्याच्या कक्षेत आणण्याचे काम हे सरकार करणार आहे, अशी माहिती उपमुख्यमंत्री देवेंद्र फडणवीस यांनी येथे दिली.
मंत्रिमंडळही लोकायुक्त कायद्याच्या कक्षेत येणार असल्याचे सांगून फडणवीस म्हणाले, सध्या अस्तित्वात असलेल्या लोकायुक्त कायद्यात भ्रष्टाचार विरोधी कायद्याचा समावेश नव्हता. नवीन विधेयकात भ्रष्ट्राचार विरोधी कायद्याचाही समावेश करण्यात आला आहे. लोकायुक्त हे उच्च न्यायालयाचे मुख्य न्यायाधीश किंवा सर्वोच्च न्यायालयाचे न्यायाधीश असतील. यामध्ये उच्च न्यायालयाचे अन्य दोन न्यायाधीशही असणार आहेत. ही पाच लोकांची समिती असेल.