मुख्यमंत्री फेलोशिप पुन्हा सुरु करणार

मुंबई दि.१३ :- होतकरू तरूणांचा राज्याच्या प्रशासनाशी सुसंवाद वाढावा, विकासाच्या संकल्पना, अभिनव उपक्रम राबविण्यात त्यांचा सहभाग घेता यावा, यासाठी ‘ मुख्यमंत्री फेलोशिप कार्यक्रम’ पुन्हा सुरु करण्याचा निर्णय मंगळवारी घेण्यात आला. मुख्यमंत्री एकनाथ शिंदे यांच्या अध्यक्षतेखाली, उपमुख्यमंत्री देवेंद्र फडणवीस यांच्या उपस्थितीत झालेल्या बैठकीत मुख्यमंत्री फेलोशिप कार्यक्रमाविषयी सादरीकरण करण्यात आले. या बैठकीस कृषीमंत्री अब्दुल सत्तार, उद्योगमंत्री उदय सामंत, कामगारमंत्री सुरेश खाडे, राज्याचे मुख्य सचिव मनु कूमार श्रीवास्तव, वित्त व नियोजन विभागाचे प्रधान सचिव राजगोपाल देवरा, उपमुख्यमंत्र्यांचे सचिव श्रीकर परदेशी आदी उपस्थित होते.

यापुर्वी हा कार्यक्रम २०१५ ते २०१९ दरम्यान राबविण्यात आला होता.‌ हा कार्यक्रम पुन्हा सुरु करताना आणखी नवसंकल्पनांचा समावेश करण्यात यावा. हा कार्यक्रम लवकरात लवकर सुरु करण्याचे नियोजन करण्यात यावे. यामध्ये राज्यातील उच्चशिक्षण-संशोधनात कार्यरत संस्थांचाही सहभागी करून घ्यावे, अशा सूचना मुख्यमंत्री शिंदे यांनी केल्या. बैठकीत उपमुख्यमंत्री कार्यालयाच्या विशेष कार्य अधिकारी प्रिया खान यांनी मुख्यमंत्री फेलोशिपबाबत सादरीकरण केले. मुख्यमंत्री फेलोशिप २०२३-२४ च्या अमंलबजावणीबाबत लवकरच सविस्तर कार्यक्रम जाहीर केला जाणार आहे.