Skip to content
मुंबई दि.१६ :- संत तुकाराम महाराज यांनी लिहिलेले अभंग आजच्या आधुनिक युगातही समर्पक, व्यवहार्य, मार्गदर्शक आहेत. त्यांनी लिहिलेल्या अभंगातून २१ अभंग निवडून ते ‘अभंग एकविशी’ पुस्तकाच्या माध्यमातून प्रकाशित करण्याचा उपक्रम कौतुकास्पद आहे, असे प्रतिपादन उपमुख्यमंत्री अजित पवार यांनी आज येथे केले.
‘गाथा परिवार’ आणि आमदार अमोल मिटकरी यांच्या संकल्पनेतून तयार करण्यात आलेल्या या पुस्तकाचे प्रकाशन उपमुख्यमंत्री पवार यांच्या हस्ते त्यांच्या देवगिरी निवासस्थानी झाले. त्यावेळी उपमुख्यमंत्री पवार बोलत होते.
जगतगुरु संत तुकाराम काळाच्या पुढचा विचार मांडणारे सत्यशोधक विचारांचे संत होते. त्यांनी लिहिलेल्या अभंगाना व्यावहारिकतेची जोड होती. सामान्य माणसाच्या जगण्यातील विचार त्यांनी मांडले, असेही उपमुख्यमंत्र्यांनी सांगितले.
यावेळी राष्ट्रवादी काँग्रेसचे प्रदेशाध्यक्ष सुनील तटकरे,अन्न व नागरी पुरवठामंत्री छगन भुजबळ, सहकारमंत्री दिलीप वळसे पाटील, विधानसभा उपाध्यक्ष नरहरी झिरवळ, राज्य महिला आयोगाच्या अध्यक्षा रुपाली चाकणकर आदी उपस्थित होते.
