डोंबिवली नागरी सहकारी बँकेला (DNS Bank) तिसऱ्यांदा सन्मान

सचिन शिंदे 

मुंबई डोंबिवली नागरी सहकारी बँकेने (DNS Bank) सहकारी बँकिंग क्षेत्रात पुन्हा एकदा आपले वर्चस्व सिद्ध केले आहे. आर्थिक वर्ष 2024–25 साठी “सर्वोत्कृष्ट नागरी सहकारी बँक” (ठेवी रुपये 2,501 कोटी ते 5,000 कोटी दरम्यान) या श्रेणीत DNS बँकेला तृतीय क्रमांकाचे पारितोषिक मिळाले आहे.

हा मान महाराष्ट्र अर्बन को-ऑपरेटिव्ह बँक्स फेडरेशन लि. तर्फे 13 सप्टेंबर 2025 रोजी नाशिक येथील श्री स्वामिनारायण कन्व्हेन्शन सेंटर येथे आयोजित वार्षिक सर्वसाधारण सभा व पारितोषिक वितरण समारंभात प्रदान करण्यात आला.

सलग तिसऱ्या वर्षी DNS बँकेला हा मानाचा सन्मान मिळाला असून, बँकेच्या मजबूत आर्थिक कामगिरी, ग्राहककेंद्रित दृष्टिकोन, सहकारी मूल्यांप्रती निष्ठा तसेच नावीन्य व शाश्वत विकासाच्या अंगीकारामुळे ही कामगिरी अधोरेखित झाली आहे.

या पुरस्काराचे वितरण उपाध्यक्ष सौ. नंदिनी कुलकर्णी, संचालक मिलिंद अरोळकर व कार्यकारी मुख्य कार्यकारी अधिकारी सौ. सुनीता पाटील यांनी स्वीकारले.

या समारंभास NUCFDC चे अध्यक्ष ज्योतिंद्र मेहता, विधान परिषद सदस्य प्रवीण दरेकर तसेच फेडरेशनचे वरिष्ठ संचालक उपस्थित होते.

या सन्मानाबद्दल कृतज्ञता व्यक्त करताना DNS बँकेच्या संचालक मंडळ व व्यवस्थापनाने सांगितले की, हा पुरस्कार ग्राहकांचा विश्वास, कर्मचाऱ्यांची निष्ठा व भागधारकांचे सातत्यपूर्ण सहकार्य यांना अर्पण आहे. या मान्यतेमुळे DNS बँक उत्कृष्ट सेवा देण्याच्या आपल्या बांधिलकीत अधिक दृढ झाली असून महाराष्ट्र तसेच देशभरातील सहकारी बँकिंग क्षेत्रात महत्त्वपूर्ण योगदान देत राहील.