Skip to content
मुंबई दि.१६ :- माजी पंतप्रधान भारतरत्‍न अटलबिहारी वाजपेयी यांच्या कवितांचा मराठी भावानुवाद ज्येष्ठ कवी, गीतकार प्रा. प्रवीण दवणे यांनी केला असून त्‍याचे पुस्‍तक लवकरच प्रकाशित करण्यात येणार आहे, अशी घोषणा भाजप मुंबईचे अध्‍यक्ष आमदार ॲड. आशिष शेलार यांनी आज केली. वाजपेयी यांच्या स्‍मृतीदिनानिमित्‍त वांद्रे येथील ‘प्रतिभांगण’ ग्रंथालयात आयोजित करण्यात आलेल्या पत्रकार परिषदेत ते बोलत होते. कवितांचे अनुवादक प्रा. प्रवीण दवणे, प्रकाशक व ग्रंथालीचे विश्‍वस्‍त सुदेश हिंगलासपुरकर यावेळी उपस्थित होते.
वर्षभरापूर्वी विलेपार्ले येथे झालेल्‍या एका जाहीर कार्यक्रमात प्रा. दवणे यांनी अटलबिहारी वाजपेयी यांच्या काही कवितांचा मराठी अनुवाद सादर केला होता. त्‍यावेळी उपस्थित असणा-या आमदार शेलार यांनी प्रा. दवणे यांना अटलीजींच्‍या सगळया कवितांचा अनुवाद करावा, अशी विनंती केली होती. दवणे यांनी हे काम एक प्रकल्‍प म्‍हणून हाती घेऊन परिश्रमपूर्वक पूर्ण केले आहे. हे पुस्‍तक ग्रंथालीतर्फे प्रकाशित करण्यात येणार आहे.
अटलबिहारी वाजपेयी यांच्या कविता ओतप्रोत देशभक्‍तीने भरलेल्‍या, अखंड भारताचे स्‍वप्‍न मांडणा-या, तरुणांना प्रेरणा देणा-या आहेत. त्‍यांच्‍या कवितांचा अनुवाद म्‍हणजे त्‍यांच्‍या शब्‍दांचा अनुवाद नसून त्‍यांच्‍या हिंदी भाषेवर संस्‍कृतचा प्रभाव असून त्‍यांची कविता ही भावनानिष्‍ठ आहे, असे प्रा. दवणे यांनी यावेळी सांगितले. मानवतेचा साक्षात्‍कार करणारी त्‍यांची कविता कुठल्‍याही एका पक्षाच्‍या चौकटीत बसणारी नाही. त्‍यामुळे या कवितांचा अनुवाद करताना मोठे आव्‍हान होते, त्‍यासाठी काशीतील एका पंडितांची मदत घेऊन अटलजींची हिंदी समजून घेतली. त्‍यामुळे हे काम माझ्या हातून नियतीनेच करुन घेतले अशी भावनाही प्रा. दवणे यांनी व्‍यक्‍त केली. तर ग्रंथालीचे विश्‍वस्‍त सुदेश हिंगलासपुरकर यांनी पुस्‍तकांच्‍या निर्मितीमागची भूमिका मांडली. या पुस्‍तकाचे प्रकाशन दिल्‍ली आणि मुंबईत करण्यात येईल असे यावेळी जाहीर करण्यात आले. पुस्‍तकाचे मुखपृष्‍ठ चित्रकार हेमंत जोशी यांनी केले असून मुखपृष्‍ठाचे अनावरणही यावेळी करण्यात आले.
