डोंबिवलीत ६५ वर्षांवरील ज्येष्ठ पुरुषांसाठी ‘एनसीएमसी’ स्मार्ट कार्ड शिबिराचा शुभारंभ

शिवसेनेच्या पुढाकाराने एसटी डेपोत विशेष नोंदणी केंद्र; १०० हून अधिक ज्येष्ठ नागरिकांनी पहिल्याच दिवशी घेतला लाभ

डोंबिवली:

महाराष्ट्र शासनाच्या धोरणानुसार ६५ वर्षांवरील पुरुष ज्येष्ठ नागरिकांना एसटी प्रवासात ५० टक्के सवलत मिळवून देणाऱ्या ‘एनसीएमसी’ (NCMC) स्मार्ट कार्ड नोंदणी शिबिराचा डोंबिवलीत उत्साहात शुभारंभ झाला. कल्याण लोकसभेचे खासदार डॉ. श्रीकांत एकनाथ शिंदे यांच्या मार्गदर्शनाखाली आणि कल्याण ग्रामीण विधानसभेचे आमदार श्री. राजेश गोवर्धन मोरे यांच्या प्रयत्नातून डोंबिवली एमआयडीसी येथील एसटी डेपोमध्ये हे विशेष शिबिर आयोजित करण्यात आले आहे.

डोंबिवलीतील ज्येष्ठ वैद्यकीय तज्ज्ञ डॉ. प्रदीप ढाके यांच्या ३८ वर्षांच्या निरंतर सेवेला नागरिकांचा सलाम

गुरुवार, ३० जुलै रोजी सकाळी १० वाजता आमदार राजेश गोवर्धन मोरे यांच्या शुभहस्ते या शिबिराचे उद्घाटन करण्यात आले. पहिल्याच दिवशी परिसरातील १०० हून अधिक ज्येष्ठ पुरुष नागरिकांनी शासनाने ठरवलेले १९९ रुपये शुल्क भरून या स्मार्ट कार्ड योजनेचा लाभ घेतला.

या प्रसंगी बोलताना आमदार राजेश मोरे यांनी सांगितले की, “ज्येष्ठ नागरिकांना एसटीचा प्रवास अधिक सुलभ, जलद आणि किफायतशीर व्हावा या उद्देशाने हे नोंदणी केंद्र सुरू करण्यात आले आहे. परिसरातील अधिकाधिक पात्र ज्येष्ठ नागरिकांनी या योजनेचा लाभ घ्यावा.”

स्मार्ट कार्ड शिबिराचे वेळापत्रक व ठिकाण:

विशेष शिबिर: ३० जुलै ते १ ऑगस्ट २०२६
वेळ: सकाळी १०.०० ते दुपारी २.००
ठिकाण: एसटी डेपो, जिमखाना रोड, एमआयडीसी, डोंबिवली (पूर्व)
नियमित सेवा (३ ऑगस्ट २०२६ पासून):
वेळ: दररोज दुपारी ३.०० ते सायंकाळी ७.००
ठिकाण: शिवसेना मध्यवर्ती शहर शाखा, डोंबिवली

आवश्यक कागदपत्रे व नियम:

१. कागदपत्रे: आधार कार्ड, ओटीपी (OTP) साठी स्वतःचा चालू मोबाईल फोन आणि २ रंगीत पासपोर्ट साईज फोटो.
२. उपस्थिती: ज्या व्यक्तीचे कार्ड काढायचे आहे, त्यांची प्रत्यक्ष उपस्थिती अनिवार्य आहे.
३. शुल्क: शासनाने निश्चित केलेले ₹१९९/- शुल्क आकारले जाईल.
४. हरवलेले कार्ड: जुने/खराब झालेले कार्ड नियमानुसार शुल्क भरून बदलून मिळेल.

एसटी महामंडळाच्या सवलत योजना एका नजरेत:
६५ वर्षांवरील पुरुष: ५०% भाडे सवलत (स्मार्ट कार्ड अनिवार्य)महिला प्रवासी: सर्व वयोगटातील महिलांना ५०% भाडे सवलत
७५ वर्षांवरील नागरिक (अमृत ज्येष्ठ नागरिक योजना): १००% मोफत प्रवास सुविधा

प्रमुख उपस्थितांची नोंद:

या शुभारंभ प्रसंगी आमदार राजेश मोरे यांच्यासह शिवसेनेचे उपजिल्हाप्रमुख राजेश कदम, विधानसभा क्षेत्र प्रमुख संतोष चव्हाण, उपशहर प्रमुख सुनील भोसले, तेजस पाटील, धर्मराज शिंदे, राज्य परिवहन विभागाचे विभाग नियंत्रक कैलास पाटील, विभागीय वाहतूक अधिकारी धनंजय शिंदे, आगार व्यवस्थापक चेतन देवधर, जिल्हा समन्वयक शैलेश देशमुख, माजी नगरसेवक प्रकाश माने यांसह एसटी महामंडळाचे अधिकारी, कर्मचारी आणि नागरिक मोठ्या संख्येने उपस्थित होते.