वारी स्वच्छ, पर्यावरण सुरक्षित! ‘निसर्गवारी’ अभियानाची विठूरायाच्या चरणी १५ वर्षांची अखंड सेवा; कचरामुक्त वारीचा संकल्प
पंढरपूर:
संतश्रेष्ठ ज्ञानेश्वर माऊली आणि जगद्गुरु संत तुकाराम महाराज यांच्या पालखी सोहळ्याने संपूर्ण महाराष्ट्र विठ्ठलमय झाला आहे. आळंदी ते पंढरपूर या पालखी मार्गावर लाखो वारकरी मोठ्या उत्साहाने आणि भक्तीभावाने सहभागी होतात.
या भक्तीच्या महासागरात पर्यावरणाचा समतोल राखण्यासाठी आणि वारीला प्लास्टिकमुक्त व स्वच्छ बनवण्यासाठी ‘थं क्रिएटिव्ह पर्यावरण दक्षता कृती मंच’ संचलित ‘निसर्गवारी: प्लास्टिक व थर्माकोल कचरामुक्त दिंडी अभियान’ गेल्या १५ वर्षांपासून अविरतपणे कार्यरत आहे.
संतांच्या विचारांचा वारसा: ‘शून्य कचरा’ वारीचे ध्येय
संतांनी आपल्याला स्वच्छता, सेवा आणि निसर्गसंवर्धनाचा संदेश दिला आहे. याच विचारांचा वारसा जपत ‘निसर्गवारी’ अभियानाने यावर्षीही पालखी मार्गावर ‘शून्य कचरा’ (Zero Waste) संकल्पना राबवण्याचा दृढ निश्चय केला आहे. अभियानाचे संस्थापक-अध्यक्ष प्रशांत अवचट यांच्या मार्गदर्शनाखाली शेकडो स्वयंसेवक वारकऱ्यांच्या सेवेत अहोरात्र झटत आहेत.
अभियानाची आतापर्यंतची अभूतपूर्व कामगिरी:
८ कोटींहून अधिक पर्यावरणपूरक पत्रावळींचे वितरण: प्लास्टिक आणि थर्माकोलला सक्षम पर्याय म्हणून कोट्यवधी नैसर्गिक पानांच्या पत्रावळींचे मोफत वाटप करण्यात आले आहे.
२ लाख+ कापडी पिशव्यांचे वाटप: वारी दरम्यान प्लास्टिक पिशव्यांचा वापर पूर्णपणे थांबवण्यासाठी वारकऱ्यांना कापडी पिशव्यांचे मोफत वाटप करण्यात आले आहे.
लाखो लिटर पाण्याची बचत: स्टील आणि इतर धातूंची भांडी-नाचण्या धुण्यासाठी लागणाऱ्या लाखो लिटर पिण्याच्या पाण्याची मोठी बचत या पत्रावळींमुळे झाली आहे.
कचऱ्यापासून थेट सेंद्रिय खत: वारी मार्गावरून गोळा केलेल्या पत्रावळींचे संकलन करून त्यापासून उत्तम दर्जाचे सेंद्रिय खत (कंपोस्ट) तयार केले जाते आणि हे खत शेतकऱ्यांना मोफत वितरित केले जाते.
डॉ. मैनाताई परांजपे: विस्मरणात गेलेल्या देशातील पहिल्या महिला हवामान शास्त्रज्ञाची प्रेरणादायी गाथा
जनभागीदारी आणि सहकार्य
या महायज्ञात श्री क्षेत्र आळंदी देवस्थान, श्री क्षेत्र देहू देवस्थान, श्री क्षेत्र पंढरपूर देवस्थान, सर्व दिंडी चालक-मालक, कीर्तनकार, शाळा-महाविद्यालये आणि विविध सामाजिक संस्थांचे मोलाचे सहकार्य लाभत आहे.
“पर्यावरण रक्षण, वारकऱ्यांचे आरोग्य आणि संतांचा एक विचार सर्व समाजमाध्यमांपर्यंत पोहोचविणे हाच आमचा खरा संकल्प आहे,” अशी भावना अभियानाचे संस्थापक-अध्यक्ष प्रशांत अवचट यांनी व्यक्त केली आहे.
आपणही या पवित्र कार्यात आर्थिक, साहित्य किंवा स्वयंसेवक म्हणून मदत करून आपले योगदान देऊ शकता आणि या पर्यावरण पूरक वारीचे भागीदार होऊ शकता.