मूलभूत सुविधां अभावी कल्याणच्या भाल गावात रोष: लोकप्रतिनिधींना बंदी घालण्याचा ग्रामस्थांचा थेट इशारा
कल्याण:
पिण्याचे पाणी, पक्के रस्ते आणि इतर नागरी सुविधांच्या अभावामुळे त्रस्त झालेल्या कल्याण पूर्व येथील भाल गावातील ग्रामस्थांनी आता आक्रमक भूमिका घेतली आहे. गेल्या अनेक वर्षांपासून केवळ पोकळ आश्वासने पदरी पडल्यामुळे संतप्त झालेल्या रहिवाशांनी एकत्र येत नगरसेवक, आमदार आणि खासदार अशा सर्वच लोकप्रतिनिधींना गावात प्रवेशबंदी (नो एंट्री) करण्याचा इशारा दिला आहे.
या संदर्भात ग्रामस्थांनी एक व्हिडिओ तयार करून सोशल मीडियावर प्रसारित केला आहे. व्हिडिओच्या माध्यमातून रहिवाशांनी आपली तीव्र नाराजी व्यक्त करत थेट इशारा दिला आहे.
आश्वासनांचा फुगा फुटला!
स्थानिक नागरिक गजानन म्हात्रे यांनी दिलेल्या माहितीनुसार, प्रत्येक निवडणुकीच्या वेळी राजकीय नेते आणि लोकप्रतिनिधी भाल गावात येऊन मूलभूत सुविधा पुरवण्याचे आश्वासन देतात. मात्र, निवडणुका संपताच आणि मतदान पार पडताच हे सर्व दावे हवेत विरून जातात.
पावसाळा सुरू असूनही पनवेलमध्ये तीव्र पाणीटंचाई; ‘टँकर नको, नळाला पाणी हवा’ म्हणत नागरिक रस्त्यावर
ग्रामस्थांनी दिलेल्या माहितीनुसार:
त्यांच्या पॅनेलवरून चार नगरसेवक निवडून आले असूनही गावातील समस्या ‘जैसे थे’ परिस्थितीमध्ये आहेत.
रस्ते, पाणी आणि मूलभूत नागरी समस्यांबाबत नगरसेवक, आमदार, खासदार आणि महापालिका प्रशासनाला वेळोवेळी निवेदने देऊनही कोणतीही ठोस कारवाई झालेली नाही.
प्रत्येक ठिकाणाहून ग्रामस्थांना केवळ आश्वासनांशिवाय काहीही मिळाले नाही.
“सुविधा नाही, तर प्रवेश नाही!”
नेत्यांच्या या उपेक्षेला कंटाळून अखेर भाल गावातील रहिवाशांनी वज्रमूठ बांधली आहे. “जोपर्यंत आमच्या गावाला पिण्याचे पाणी, रस्ते आणि इतर सर्व आवश्यक मूलभूत सुविधा प्रत्यक्ष उपलब्ध करून दिल्या जात नाहीत, तोपर्यंत कोणत्याही लोकप्रतिनिधीला गावात पाय ठेवू दिला जाणार नाही,” असा ठाम निर्धार ग्रामस्थांनी केला आहे. या निर्णयामुळे स्थानिक राजकीय वर्तुळात मोठी खळबळ उडाली आहे.