मुंबईकरांचा जीव वाचवायचा असेल तर ‘या’ गाड्यांना मुंबईबाहेर काढा; रेल्वे प्रशासनासमोर गंभीर आव्हान
डोंबिवली:
मुंबईची ‘लाईफलाइन’ असलेल्या लोकल ट्रेनची दुरवस्था आणि त्यातून होणारे प्रवाशांचे बळी, हा विषय आता गंभीर वळणावर आला आहे. उपनगरी लोकलची वाढती गर्दी आणि त्या तुलनेत रेल्वे प्रशासनाचे अपुरे नियोजन यामुळे दररोज चाकरमान्यांना मृत्यूच्या दाढेत प्रवास करावा लागत आहे. या समस्येवर ठोस उपाय शोधताना, आता मेल-एक्सप्रेस गाड्यांचे नियोजन बदलण्याची वेळ आली आहे।
लोकलचा खोळंबा आणि मेल-एक्सप्रेसचा अडथळा
मध्य रेल्वेवर प्रवाशांची गर्दी प्रचंड वाढली आहे. ही गर्दी कमी करण्यासाठी लोकलच्या फेऱ्या वाढवणे आवश्यक आहे. मात्र, रेल्वे मार्ग आणि टर्मिनल्सची क्षमता संपत आली आहे. कल्याण ते कुर्ला दरम्यान ५ वी आणि ६ वी लाईन टाकूनही, कुर्ला ते सीएसएमटी मार्ग रखडल्याने परिस्थिती जैसे थे आहे. आजही अनेकदा तिसऱ्या आणि चौथ्या लाईनवरून मेल-एक्सप्रेस गाड्या चालवल्या जातात, ज्यामुळे लोकलचा वेग मंदावतो आणि चाकरमान्यांचा कामावर जाण्यास उशीर होतो.
काय आहे उपाय? नवीन टर्मिनसची गरज
मुंबईतील सीएसएमटी, दादर आणि एलटीटी या प्रमुख टर्मिनल्सवरील ताण कमी करण्यासाठी, मुंबईबाहेर नवीन टर्मिनस उभारणे हाच एकमेव पर्याय आहे.
प्रस्तावित उपाय: पनवेलच्या धर्तीवर कल्याण, बदलापूर, कर्जत, टिटवाळा आणि कसारा येथे नवीन रेल्वे टर्मिनस उभारले जावेत.
गाड्यांचे नियोजन: मुंबईतून फक्त देशाच्या राजधानींना जोडणाऱ्या प्रमुख राजधानी एक्सप्रेस गाड्या सोडाव्यात. तर, महाराष्ट्राच्या अंतर्गत भागात जाणाऱ्या मेल-एक्सप्रेस आणि पॅसेंजर गाड्या मुंबई सी एस एम टी, एल टी टी, दादर, मुंबई सेंट्रल, बांद्रा, वसई आणि कल्याण टर्मिनल्सवरून सोडाव्यात.
कोकणवासियांवर अन्याय का?
मुंबईतून उत्तर भारताकडे जाणाऱ्या अनेक गाड्या सुरू करण्यात आल्या, मात्र कोरोना काळापासून कोकणात जाणाऱ्या अनेक महत्त्वाच्या गाड्या अद्याप बंद आहेत. विशेषतः ‘दादर-रत्नागिरी’ गाडी सुरू करण्याची मागणी सातत्याने दुर्लक्षित केली जात आहे. एकीकडे कोकणवासीयांच्या सोयीची गाडी बंद ठेवायची आणि दुसरीकडे त्याच मार्गावर उत्तर भारताच्या गाड्या सुरू करायच्या, यामुळे मराठी चाकरमानी आणि कोकणवासीयांच्या जखमेवर मीठ चोळले जात असल्याचे चित्र आहे.
आता आक्रमक होण्याची गरज
केवळ लोकलचे डबे वाढवून किंवा फेऱ्यांची संख्या वाढवून हा प्रश्न सुटणार नाही. जोपर्यंत मुंबईतील टर्मिनल्सवरील लांब पल्ल्याच्या गाड्यांचा ताण कमी होत नाही, तोपर्यंत लोकलचा मार्ग मोकळा होणार नाही.
या मागणीसाठी आता प्रवाशांनी, रेल्वे प्रवासी संघटनांनी आणि लोकप्रतिनिधींनी एकत्र येणे आवश्यक आहे. मुख्यमंत्री, उपमुख्यमंत्री, केंद्रीय रेल्वे मंत्री आणि संबंधित रेल्वे अधिकाऱ्यांना तातडीने पत्रव्यवहार करून, गरज पडल्यास आंदोलनाचा मार्ग स्वीकारण्याचे तयारीची गरज आहे.
मुंबईकरांचा जीव वाचवण्यासाठी आणि त्यांचा प्रवास सुखकर करण्यासाठी रेल्वे प्रशासनाने आता ‘मुंबईबाहेर टर्मिनस’ या संकल्पनेवर गांभीर्याने विचार करावा, हीच मागणी आता जोर धरत आहे.