दादरच्या छबिलदास स्कूलमध्ये रंगली ‘मास्टरशेफ स्पर्धा’; विद्यार्थ्यांच्या पाककौशल्याला पालकांचा उत्स्फूर्त प्रतिसाद

मुंबई (विशेष प्रतिनिधी):

शिक्षण म्हणजे केवळ पुस्तकी ज्ञान नसून विद्यार्थ्यांच्या व्यक्तिमत्त्वाचा आणि जीवनकौशल्यांचा विकास करणे हाच खरा शिक्षणाचा उद्देश आहे, हे दादर येथील छबिलदास इंग्लिश मीडियम स्कूलने (CBSE Affiliated) पुन्हा एकदा सिद्ध केले आहे. शाळेच्या वतीने विद्यार्थ्यांसाठी आयोजित करण्यात आलेली अनोखी ‘मास्टरशेफ स्पर्धा २०२६-२७’ नुकतीच अत्यंत उत्साहपूर्ण वातावरणात आणि एखाद्या टेलिव्हिजन रिअॅलिटी शोसारख्या भव्य नियोजनात संपन्न झाली. २४ आणि २५ जून २०२६ रोजी झालेल्या या दोन दिवसीय स्पर्धेला विद्यार्थी, पालक आणि शिक्षकांचा भरघोस प्रतिसाद मिळाला.

उन्हाळ्याच्या सुट्टीचा विधायक उपयोग व्हावा आणि मुलांमध्ये स्वावलंबनाची भावना रुजावी, यासाठी शाळेने विद्यार्थ्यांना महिनाभरापूर्वीच घरी खाद्यपदार्थ तयार करण्याचा सराव करण्याची प्रेरणा दिली होती. या सरावातूनच या अनोख्या स्पर्धेची संकल्पना प्रत्यक्ष आकारास आली.

प्रसिद्ध ‘मामा काणे’ आणि ‘चैतन्य’ उपाहारगृहांच्या संचालकांच्या हस्ते उद्घाटन

स्पर्धेचे उद्घाटन दादरमधील प्रसिद्ध ‘मामा काणे’ उपाहारगृहाचे मालक श्रीधर कमलाकर काणे यांच्या हस्ते दीपप्रज्वलन करून करण्यात आले. यावेळी ‘चैतन्य – अस्सल मालवणी भोजनगृह’च्या संचालिका सायली वाळके यांची विशेष उपस्थिती लाभली होती. उद्घाटन करताना श्रीधर काणे म्हणाले, “विद्यार्थ्यांनी तयार केलेल्या पदार्थांमध्ये कल्पकता, मेहनत आणि आत्मविश्वास स्पष्टपणे दिसून आला. अशा उपक्रमांमधून मुलांमध्ये आयुष्यभर उपयोगी पडणारी कौशल्ये विकसित होतात.”

सर्वांगीण विकासासाठी जीवनोपयोगी शिक्षण आवश्यक

याप्रसंगी संस्थेचे अध्यक्ष शैलेंद्र साळवी यांनी आपले विचार मांडताना सांगितले, “विद्यार्थ्यांच्या सर्वांगीण विकासासाठी शैक्षणिक ज्ञानाबरोबरच जीवनोपयोगी कौशल्यांचे शिक्षणही तितकेच आवश्यक आहे. ‘मास्टरशेफ’सारखे उपक्रम विद्यार्थ्यांचा आत्मविश्वास आणि सर्जनशीलता वाढविण्यास मदत करतात.” तर शाळेच्या मुख्याध्यापिका सौ. कोमल मॅडम यांनी सांगितले की, “प्रत्येक विद्यार्थ्यामध्ये दडलेल्या सुप्त गुणांना योग्य व्यासपीठ उपलब्ध करून देणे आणि शिक्षणाला आनंददायी अनुभव बनविणे हाच आमचा मुख्य उद्देश आहे.”

दुसऱ्या दिवशी प्रसिद्ध अभिनेते समीर खांडेकर यांची हजेरी

स्पर्धेच्या दुसऱ्या दिवशी मराठी मनोरंजन क्षेत्रातील प्रसिद्ध अभिनेते, लेखक, दिग्दर्शक तसेच ‘पिठी भात’ उपाहारगृहाचे मालक समीर खांडेकर प्रमुख पाहुणे म्हणून उपस्थित होते. विद्यार्थ्यांचे कौतुक करताना ते म्हणाले, “छबिलदास शाळेने विद्यार्थ्यांच्या सुप्त कलागुणांना व्यासपीठ उपलब्ध करून देत शिक्षणाची व्यापक संकल्पना प्रत्यक्षात साकारली आहे.”

अशी रंगली स्पर्धा आणि हे आहेत विजेते:

या दोन दिवसीय स्पर्धेत इयत्ता ६ वी ते ८ वी मधील एकूण ३८ विद्यार्थ्यांनी प्रत्यक्ष सहभाग नोंदविला. त्यापैकी २० विद्यार्थ्यांना सहभाग व गुणवत्ता प्रमाणपत्रे प्रदान करून गौरविण्यात आले. विद्यार्थ्यांनी दाखवलेली स्वच्छता, सादरीकरण, चव आणि आत्मविश्वास यांचे परीक्षकांनी विशेष कौतुक केले.

🏆 स्पर्धेचा सविस्तर निकाल पुढीलप्रमाणे:

इयत्ता ६ वी (पदार्थ: विविध प्रकारचे पोहे आणि चहा)

प्रथम क्रमांक: कवीश कोलते

द्वितीय क्रमांक: आदित्य पाटील

तृतीय क्रमांक: अथर्व सुर्वे

उत्तेजनार्थ: पर्व खंडोर

इयत्ता ७ वी (पदार्थ: स्वादिष्ट कटलेट आणि चहा)

प्रथम क्रमांक: स्वर्णिका सुर्वे

द्वितीय क्रमांक: आराध्या विरले

तृतीय क्रमांक: अवनी राऊळ

उत्तेजनार्थ: श्राव्या पालवणकर

इयत्ता ८ वी (पदार्थ: चवदार पराठे आणि चहा)

प्रथम क्रमांक: गौरी पोतदार

द्वितीय क्रमांक: अजान शेख

तृतीय क्रमांक: आरोही शाह

उत्तेजनार्थ: क्रिशवी पटेल

या उपक्रमाच्या यशस्वी आयोजनासाठी शाळेतील सर्व शिक्षक, शिक्षकेतर कर्मचारी आणि विद्यार्थ्यांनी अतोनात परिश्रम घेतले. शिक्षणासोबतच जीवनकौशल्यांचा विकास घडवून आणणाऱ्या या अभिनव उपक्रमामुळे छबिलदास इंग्लिश मीडियम स्कूलचे सर्व स्तरांतून कौतुक होत आहे.