रेमडिसिवीरचा काळाबाजार करणाऱ्या आरोपींसोबत उपनिरीक्षकाची पार्टी

 

पुणे : चतुःश्रुंगी परिसरात रेमडिसिवीर जास्त दराने विक्री प्रकरणात पकडलेल्या आरोपींच्या नातेवाईकांसोबत गुन्हे शाखेच्या उपनिरीक्षक पार्टीला गेल्याचा धक्कादायक प्रकार समोर आला आहे. या पार्टीमध्ये त्या उपनिरीक्षकाने एका लहान मुलीची छेड काढली. त्यामुळे त्या पोलिस उपनिरीक्षकाला तत्काळ निलंबित करण्यात आले आहे.
दीपक माने असे निलंबित करण्यात आलेल्या त्या उपनिरीक्षकाचे नाव आहे.

शहरात रेमडिसिवीर इंजेक्शनचा काळाबाजार सुरू आहे. हा काळाबाजार रोखण्यासाठी पोलिस आयुक्तांनी दहा पथके तयार केली आहेत. तसेच, अशा व्यक्तींवर कठोर कारवाईच्या सूचना दिल्या आहे. मात्र, काळाबाजार करणाऱ्या आरोपींना पकडल्यानंतर त्या आरोपींच्या नातेवाईकांसोबत कारवाई करणाऱ्या पथकातील पोलिस अधिकारी पार्टी करत असल्याचे समोर आल्यानंतर पोलिस दलात खबळबळ उडाली आहे. दीपक माने हा गुन्हे शाखेच्या युनिट चार मध्ये कार्यरत आहेत. या युनिटनेच १७ एप्रिल रोजी चतुःश्रुंगी पोलिस ठाण्याच्या हद्दीत सख्या भावांना रेमडिसिवीर इंजेक्शन जास्त दराने विक्री करताना पकडले होते. त्यांच्याकडून दोन रेमडिसिवीर इंजेक्शन जप्त केली होती. याप्रकरणी चतुःश्रुंगी पोलिस ठाण्यात गुन्हा दाखल करण्यात आला होता.

या गुन्ह्याच्या अनुषंगानेच आरोपींच्या नातेवाईकांसोबत माने याची ओळख झाली होती.
उपनिरीक्षक माने हा २० एप्रिल रोजी आरोपींच्या नातेवाईकांच्या घरी पार्टी करण्यासाठी गेला होता. त्या ठिकाणी त्याने पार्टीत मद्यपान केले. त्यानंतर मद्यधुंद अवस्थेमध्ये नातेवाईकांच्या लहान मुलीसोबत अश्लिल वर्तन करून तिची छेडछाड केली. तसेच, सर्वांना आरोपी बनविणार असल्याची धमकी दिली. याबाबत एका महिलेने वरिष्ठ अधिकाऱ्यांकडे तक्रार केली होती. त्या तक्रारीची दखल घेऊन चौकशी करण्यात आली. त्यावेळी आरोपीने केलेले वर्तन खरे असल्याचे आढळून आले. त्याने पोलिस खात्याच्या शिस्तीस बाधा आणणारे वर्तन केल्याचा ठपका ठेऊन निलंबित आले आहे. माने याची खात्याअंर्तगत चौकशी सुरू करण्यात आली आहे. निलंबन कालावधीत मुख्यालय सोडून जाण्यासाठी परवानगी घ्यावी, असे आदेशात म्हटले आहे.

Leave a Reply

Your email address will not be published.