बेकायदा मंडपांवर कारवाई करा – मुंबई उच्च न्यायालय.

(श्रीराम कांदु)
 उत्सवांमध्ये बेकायदा मंडपांवर कारवाईचे केवळ कागदी घोडे नाचवू नका आणि कारवाईचा दिखावा करू नका, तर प्रत्यक्ष कृती करून ठोस कारवाई करा, अशा शब्दांत मुंबई उच्च न्यायालयाने गुरुवारी ठाणे महापालिका प्रशासनाला कानपिचक्या दिल्या. तसेच येत्या माघी गणेशोत्सवादरम्यान रस्त्यांवर बेकायदा मंडप घालण्यात आले, तर त्यावरील कारवाईबाबत कोणती पावले उचलली आहेत, अशी विचारणाही न्यायालयाने पालिकेला केली.
उत्सव काळातील ध्वनिप्रदूषण व रस्ते खोदून किंवा बेकायदा पद्धतीने उभारण्यात येणारे मंडप याविषयी डॉ. महेश बेडेकर व अन्य अनेकांच्या याचिकांवर न्या. अभय ओक व न्या. ए. के. मेनन यांच्या खंडपीठापुढे पुढची एकत्रित सुनावणी झाली. त्यावेळी खंडपीठाने ठाणे मनपाला पुन्हा एकदा धारेवर धरले. मंडपात मूर्ती ठेवण्यात आली होती आणि अन्य तयारी सुरू होती, त्यामुळे कारवाई करता आली नाही, असे काही पालिकांतर्फे गेल्या सुनावणीच्या वेळी सांगण्यात आले होते. त्या संदर्भात खंडपीठाने ठणकावून सांगितले की, कारवाईबाबत यापुढे अशी सबब चालणार नाही. कारवाईत अडथळा आणणाऱ्यांवर गुन्हे नोंदवण्याचे निर्देश यापूर्वीच पोलिसांना दिले असल्याकडेही खंडपीठाने लक्ष वेधले. नियमांचे पालन केले नसलेल्या मंडपांना यापुढे महापालिका आयुक्तांव्यतिरिक्त अन्य कोणत्याही अधिकाऱ्याने नियमित करून घेऊ नये. त्याचबरोबर वाहतूक पोलिसांच्या परवानगीशिवाय राज्यभरात कुठेही रस्त्यांवर मंडपाला परवानगी देण्यात येऊ नये, असेही खंडपीठाने बजावले.
Please follow and like us:

Leave a Reply

Your email address will not be published. Required fields are marked *

error

Enjoy this blog? Please spread the word :)

Follow by Email